作為電視兒童，細時由香港早晨煲到晚間新聞係好平常嘅。劇集係電視重要組成部份，而喺香港，醫療劇一直都係大製作重頭戲，鋪天蓋地大型宣傳收視亦非常高。以拯救生命為背景，急救鏡頭當然唔少得，心肺復甦法(CPR) 可謂急救中不可或缺嘅基本步，急救鏡頭做得好唔好唔止影響觀感，仲有機會教壞人。雖然明知做戲係假，但到底電視劇入面嘅急救鏡頭同現實距離又有幾遠？
ER & beyond
講醫學劇，ER 必定榜上有名。ER 喺1994年啟播，曾經提名艾美獎124次，攞過23個艾美獎獎項，播咗15季直到2009年先大結局嘅美劇，一直係好多醫生成為醫生前嘅最愛。除咗上娛樂雜誌，叫得風魔全球，ER嘅影響力點止係咁，係勁到上埋醫學期刊。早於1996年NEJM就有研究 ER, Chigaco Hope, Rescus 911嘅CPR場口，發現劇入面75%嘅患者心臟停頓經急救可以有返心跳，比例之高真係死都死要去個間院先得。然後，1998年BMJ亦有為英國當地醫療劇 (Casualty, Cardiac Arrest, and Medics )出過類似研究，佢哋發現當中約38% 即時有返心跳，17%出到院，總結話英國本地嘅醫學劇真實過美國嘢咁囉。
以為比較咗咁就完？劇集續完一季又一季，啲Study亦都一樣。諗唔到出咩？睇電視啦！ER ，Grey's Anatomy 呢啲出名又長壽醫療劇集一直引起研究人員嘅關心。雖然未去到成立每日關注組計住醫療劇集呈現CPR與現實嘅距離，但都係深深念念，出過一張又一張嘅紙，實行定時定候同觀眾check 吓佢哋有無改進。
較近期就有呢份喺2020年係AJEM 發表嘅研究，目標係研究2010年後嘅醫療劇集同American heart Association (AHA)嘅CPR 建議其實差幾遠。
點解揀2010年後?
2010年AHA 改咗指引，指心跳停頓時搓（猜）係最重要，搓（猜）係最重要，搓（猜）係最重要！A-B-C 變成C-A-B外，協會仲建議每分鐘最少100下，同起碼要有5cm(2吋)，咁梗係搵返2010年後劇集比較先合適啦。
